Nëse para 33 vitesh u rrëzua muri i diktaturës, sot është koha që hapim kafazin në të cilin politika e ka futur rininë dhe bllokon lirinë e tyre për të marrë në dorë Shqipërinë. Situata flet për një rini që do emigrimin.
Gjatë këtyre ditëve po zhvillohet një projekt i mbështetur nga delegacioni i BE-së në Shqipëri, i shtrirë në disa qytete të vendit për të kuptuar më shumë lidhur me interesimin e të rinjve për të votuar, sa ndikohen ata nga prindërit apo nga shoqëria e tyre në përgjithësi. Ambasadorët e të rinjve europianë, sikurse do t’i prezantojmë edhe të ftuarat tona, kanë nxjerrë disa konkluzione lidhur me Rrëshenin dhe Korçën.
Daniela Kortoçi, inxhiniere ndërtimi tha se qëllimi është të flitet me të rinjtë për votën, sa të informuar janë për kandidatët dhe a po ndikohen nga prindërit për votën. Ajo tha nga vëzhgimet në terren kanë konstatuar se të rinjtë nuk e shohin votën si zgjidhje të problemeve të tyre, por zgjidhjen e vetme e shohin të largohen jashtë vendit.
“Duke pasur parasysh fushatën para dy viteve më parë dhe këtë të këtij viti, këta të rinj s’e shohin votën si zgjidhje të problemeve të tyre, sidomos të rinjtë në Tropojë, qarku i Kukësit zgjidhjen e vetme e shohin te emigrimi jo te vota. Ata kanë një retorikë të gatshme nga mjedisi që ky vend nuk bëhet”, tha ajo.