Në përfundim të mbledhjes së mbajtur sot, Këshilli Kombëtar ka dalë edhe me një vendim. Në dokumentin e siguruar nga tirananews.al mësohet se Këshilli Kombëtar vendosi të mbështesë zgjidhjen politike të ofruar nga opozita e bashkuar, për një Qeveri Tranzitore, e gatshme të ndërmarrë hapat e nevojshëm për garantimin e zgjedhjeve të lira dhe të ndershme dhe zhbllokimin e procesit të integrimit europian të Shqipërisë.
Gjithashtu, sanksionohet se Partia Demokratike e Shqipërisë do të regjistrohet në zgjedhje vetëm pasi të jenë krijuar kushtet për zgjedhje të lira dhe të ndershme. Kriza e rëndë politike në vend, nuk mundëson standardet demokratike për zgjedhje të lira dhe të ndershme, pasi është provuar se Qeveria e Edi Ramës ka bashkëpunuar me krimin e organizuar për blerjen e votive, raporton tirananeës.al.
Më tej në vendim thuhet se në mbrojtje të demokracisë dhe të votës së lirë, Partia Demokratike e Shqipërisë angazhohet të mos lejojë përveç zgjedhjeve të lira asnjë farsë elektorale, të organizuar nga Qeveria ilegjitime e Edi Ramës. Përmes përshkallëzimit të aksionit opozitar, Partia Demokratike e Shqipërisë angazhohet të pamundësojë mbajtjen e zgjedhjeve fasadë, të diktuara nga pakti i Edi Ramës me krimin e organizuar dhe paratë e pista të tyre, shkatërrimtare për demokracinë dhe zgjedhjet e lira.
“Të mandatojë Kryetarin e Partisë dhe Sekretarin e Përgjithshëm të Partisë Demokratike për të negociuar dhe nënshkruar me partitë politike të opozitës marrëveshjen e koalicionit për:
a) garantimin e zgjedhjeve të lira dhe të ndershme;
b) çrrënjosjen e krimit, korrupsionit, dhe çlirimin e ekonomisë nga oligarkia dhe krimi që po shkatërrojnë punësimin, investimet dhe mundesite per shqiptarët;
c) vijimin e aksionit opozitar për plotësimin e këtyre objektivave, perfshire, mandatin dhe detyrat e Qeverisë Tranzitore dhe platformen dhe bashkëpunimin për zgjedhje të lira dhe te ndershme”, thuhet në vendimin e marrë sot nga PD. / tirananews.al
