Analisti Lorenc Vangjeli ka zbuluar për herë të parë në emisionin Java në RTSH numrin e shqiptarëve që kanë probleme me ligjin në Evropë. Vangjeli citon një raport konfidencial të Europol-it, që i rendit shqiptarët të fundit në listën e krimit, mbas rusëve, serbëve, ukrainasve dhe marokenëve.
Vangjeli tha se ka një dilemë gjithmonë e më të madhe nëse shqiptarët janë shndërruar përfundimisht në mafien më të rrezikshme për Evropën apo kjo është një fantazmë e ekzagjeruar, një mit i krijuar nga media, nga frika që ushqen ksenofobinë dhe steriotipet që shoqërojnë emigrantin e varfër. “Duke e parë këtë dilemë nga pikpamja numerike, qoftë si numër banorësh, qoftë si statistikë policore të shqiptarëve problematikë në lidhje me ligjin në Evropë, përfundimi ngjan i ndryshëm”, tha Vangjeli.
Java në RTSH ka mundur të konsultojë një raport konfidencial të Europol-it dhe e bën publik për herë të parë.
Analisti Vangjeli tha se sipas raportit, në kontinentin e vjetër veprojnë rreth 5000 grupe kriminale aktive. Më shumë se gjysma e tyre, rreth 60 për qind, përbëhen nga shtetas të BE-së.
Vetëm 13 për qind e grupeve vlerësohet se kanë të përbërë eksluzivisht nga shtetas jo të BE-së, por nga ekstrakomunitarë. Shqiptarët, të cilën në raport cilësohen shqipfolës dhe përfshijnë qytetarë që vijnë nga Shqipëria, Kosova, Maqedonia e Veriut dhe gjetkë, zënë 6 për qind të numrit të të dyshuarve si pjestarë të grupeve kriminale me përbërje jo nga BE-ja.
Rusët shkojnë në 10 për qind, serbët e ukrainasit 7 për qind, marokenët gjithashtu 6 për qind.
Për shqiptarët Europol-i përdor dhe cilësimin: krimi endacak ose shëtitës. Që do të thotë se shqetësim të thellë sjellin shtetas të cilët qëndrojnë nga një deri në dy javë në vendet e BE-së, kryejnë krime dhe rikthehen në Shqipëri ku i fshihen ndëshkimit dhe gëzojnë paratë e ardhura nga aktiviteti kriminal.
Nga ana tjetër, posaçërisht në Hollandë, sipas statistikave zyrtare, në vitin 2017 ka pasur 58 shqiptarë me problem me ligjin, nga të cilët vetëm 18 janë dënuar me vendim gjykate dhe 40 të tjerë kanë qenë në paraburgim. Të arrestuar apo të dënuar në episode në lidhje me drogën, kanë qenë vetëm 29 qytetarë shqiptarë. / javanews.al
