Sali Berisha ka zhvilluar pasditen e kësaj të enjte një takim me anëtarët e departamentit “Brain Gain” në selinë blu. Gjatë fjalës së tij, Berisha është shprehur se PD-ja është një lokomotivë e reformave të tregut dhe e proceseve integruese. Berisha po ashtu ka prezantuar botimin më të ri me titull “Libri i punëve të mira të PD-së”, për të cilin ka thënë se është një libër që frymëzon demokratët për një të ardhme edhe më të mirë.
“Është një dëshmi se PD është një lokomotivë e reformave të tregut, është një lokomotivë e proceseve integruese dhe një gardiane e vokacionit perëndimor të vendit.
Jemi në prag të këtyre zgjedhjeve, natyrisht nuk mund të mos themi se këto 10 vite, po t’i karakterizojmë në rrafshin filozofik, kanë qenë vite të një kohe të ndaluar, në kuptimin që progresi, zhvillimi i Shqipërisë, avancimi i këtij procesi që është jetik për Shqipërinë, u ngadalësua në mënyrë të jashtëzakonshme, njohu edhe prapa-kthehu.
Shqipëria, që në vitin 2013 ishte vendi me rrogat më të larta në rajon, u katandis sërish në vendin më të varfër me rrogat më të ulëta në rajon me vetëm 20 përqind të qytetarëve të saj që marrin ndihmë ekonomike dhe janë në nevojë për ndihmë ekonomike”,-tha Berisha.