E mori drejtimin e PD-së në 2013 dhe e la në 2022. Pas një viti, Lulzim Basha rikthehet në PD. Dalja e tij e fundit me studentë dhe të rinj jep sinjalin publik se ai ka vendosur të rimarrë drejtimin e PD-së zyrtare.
“Kjo kohë reflektimi më shërbeu të shihja edhe më qartë sesi ky sistem politik ka degraduar në një shfaqje që ka në qendër hallet e politikanëve, jo problemet e qytetarëve. Sherret, akuzat dhe baltosja nuk mund të jenë përgjigjja për sfidat e mëdha që ka Shqipëria. Më shumë se 70% të qytetarëve e ka refuzuar këtë teatër politik, që nuk ka asnjë zgjidhje për familjet shqiptare. Kjo shumicë e heshtur kërkon një ndryshim rrënjësor në politikbërjen e vendit, një ndryshim që patjetër mund ta sjellim të gjithë bashkë”,-tha dje Basha.
Kurse Berisha nuk e ka në plan që të japë dorëheqjen nga drejtimi i PD-së së tij, ndonëse humbi thellë. PD-ja me Bashën merr çdo gjë zyrtare, edhe me gjykatë. Berishës do ti mbetet të dalë nga çadra e Ilir Metës dhe të krijojë parti të re politike. Me sa duket do të kemi tre palë nga qendra deri në të djathtë, Ilir Meta, Sali Berisha dhe Lulzim Basha.
Arlind Qori dhe Adriatik Lapaj apo edhe disa të tjerë mundet të jenë konkurues duke marrë vota nga qendra deri majtas. E mira e politikës dhe e popullit ishte që të iknin të gjithë këta që kanë vite në pushtet dhe në opozitë, por me sa duket asnjeri nuk ikën, ndaj edhe Lulzim Basha ka të drejtën e tij të shkojë në krye të PD.