“Dua të marr makinën time.” Kjo është kërkesa e parë e Fedir Alpatov, 1 ditë pas lirimit nga qelia, ku qëndroi për 9 muaj si i dyshuar për spiunazh, bashkë me miqtë e tij, 2 rusët, Svetlana Timofevaa dhe Mikhail Zorin. Edhe këta tashmë të liruar me vendim të Gjykatës së Elbasanit.
Në një deklaratë për mediat, Alpatov, i cili vijon të jetë nën hetim për të njëjtat akuza, tha se është thjesht një bloger.
“Ditët e mia në burg nuk ishin të mira. Unë nuk jam një kriminel, nuk jam një vrasës, jam thjesht një njëri i apasionuar pas vendeve historike. Unë jam një bloger dhe kam hobi të udhëtoj dhe vizitoj vende dhe studioj histori të shteteve të ndryshme. Unë kam qenë në vende të ndryshme në Europë, por nuk jam arrestuar, sepse nëse një vend është i braktisur mund ta vizitosh, vetëm në Shqipëri rezultoi një problem.”
Prokuroria e Elbasanit u detyrua të kërkonte vetë në Gjykatë, lirimin e tyre nga qelia pasi nuk arriti të grumbullonte të gjitha provat brenda afatit ligjor të hetimeve.
Ndaj Alpatov dhe Timovevës u caktua masa e detyrimit për t’u paraqitur dhe në “Arrest shtëpie” u la Mikhail Zorin, në pritje të akt ekspertimeve për disa nga pajisjet e tyre të dërguara jashtë vendit.
Ukrainasi dhe 2 shtetasit rus u arrestuan me bujë në Gusht të 2022 sepse hynë në ambientet e Uzinës Ushtarake në Gramsh dhe pasi iu kërkua të largoheshin u konfrontuan me ushtarët roje.
Ndaj tyre u ngrit akuza e spiunazhit, edhe pse ata e kundërshtuan atë gjatë hetimeve.