Këshilli Drejtues i Televizionit ublik Shqiptar ka hapur konkursin për zgjedhjen e Drejtorit të PËrgjithshëm, një post vakat që prej dorëheqjes së Enkelej Jotit.
Me vendim unanim të anëtarëve prezent çdo kandidat që plotëson kushtet e ligjit, mund të hedhë kandidaturën për të drejtuar median publike të Republikës së Shqipërisë.
Faza e aplikimit do të jetë e hapur 10 ditë siç e përcakton ligji, duke nisur nga mbledhja plenare që zyrtarizoi nisjen e procesit për plotësimin e vendit vakant në krye të medias publike shqiptare.
Kryetari i Këshillit Drejtues njoftoi po sipas ligjit kriteret që duhet të plotësojnë kandidatet për të qenë drejtor të përgjithshëm të RTSH-së.
Nuk lejohen të kandidojnë ata që kanë qenë deputetë apo kandidatë për deputetë në dy legjislaturat e fundit, ata që janë anëtarë partish politike apo organizatash politike, ata që janë të zgjedhur në pushtetin vendor.
Pasi kandidatët që do të hyjnë në këtë garë të dorëzojnë dokumentet dhe platformën e tyre, anëtarët e Këshillit Drejtues do të mblidhen për të përzgjedhur ata persona që plotësojnë kriteret ligjore.
Më pas procedura parashikon seanca dëgjimore me çdo kandidat për drejtor të përgjithshëm dhe në fund anëtarët e Këshillit Drejtues do të votojnë në mënyrë të fshehtë për të zgjedhur drejtuesin e ri të RTSH-së.
Ish-drejtori i Përgjithshëm i këtij televizioni, Enkelejd Joti dha dorëheqjen nga posti i tij më 13 Prill të këtij viti. Përmes një shkrese drejtuar Këshillit Drejtues të RTSH-së, Joti dha dorëheqjen e parevokueshme nga posti i cili mbante që prej vitit 2021. Dorëheqja e tij erdhi pasi më pas u emërua në postin e zv.Ministrit të Mbrojtjes.