Kopshtet dhe shkollat e kryeqytetit, së shpejti mund të mbulohen nga tarraca multifunksionale të gjelbëruara dhe me panele diellore të integruara. Të paktën ky është qëllimi i një studimi fizibiliteti që parashikohet të kryhet, me qëllim rivitalizimin e tarracave të objekteve arsimore publike në kryeqytet. projekti parashikon krijimin e taracave të gjelbëra me funksione rekretaive, sportive apo edhe zhvillimin e bujqësisë urbane si dhe gjenerimin e energjisë së rinovueshme.
Për këtë qëllim është shpallur edhe një tender me vlerë 15,9 milionë lekë.
Referuar argumentimeve në dokumentet e tenderit, rivitalizimi i këtyre tarracave do të sillte jo vetëm shtimin e gjelbërimit në qytet por edhe përfitimin e energjisë së gjelbër dhe kursimin e burimeve të energjisë nga rrjeti apo edhe përdorimin e këtyre tarracave si laboratorë të hapur për çështjet mjedisore apo të energjisë, raporton SCAN.
“Nëpërmjet krijimit të tarracave multifunksionale të gjelbëruara dhe me panele diellore të integruara për gjenerimin e energjisë elektrike të aplikuara në një pjesë të këtyre objekteve (kopshte, shkolla), fëmijët do të mund të marrin edhe edukatën medisore dhe mund t’ua transmetojnë prindërve të tyre , duke krijuar në këtë mënyrë një bashkëveprim natyrë-familje si dhe krijimin e një modeli i cili mund të aplikohet më vonë edhe në ndërtesat private.
Duke qenë se praktika të tilla po përhapen gjerësisht në rajon, por duke qenë edhe të vetëdijshëm për kapacitetet tona për zgjidhje të tilla, ne kërkojmë të bëjmë një studim fizibiliteti për integrimin e kësaj zgjidhjeje. Ky studim do të duhet të japë përgjigje për disa çështje që praktikisht do të jenë pjesë e kësaj ideje” shkruhet në dokumentet e tenderit.