Presidenti i ri i Maqedonisë, në dorë të opozitës shqiptare

Dy nga tre kandidatët në garën për Presidencën e Maqedonisë së Veriut, do të përballen në balotazh më 5 maj. 
Në votimet e të dielës Stevo Pendarovski e Gordana Siljanovska Davkova mbërritën “rrotë më rrotë” në finish, duke fituar njëri 42.84% dhe tjetra, 42.24% të votave.
Diferencën mes tyre, me 10.57% e bëri Blerim Reka, i mbështetur nga partitë shqiptare të opozitës “Aleanca” dhe Lëvizja “Besa”.
Kjo do të thotë se i gjithë faktori politik shqiptar në Maqedoninë e Veriut, si në mazhorancë e tani edhe ata në opozitë, bëhen përcaktues për zgjedhjen e Presidentit të ri të vendit. 
Rezultati i ngushtë i dy kandidatëve që dolën në raundin e dytë pasqyron dallimet e thella rreth marrëveshjes që qeveria e Zaev arriti me Greqinë për emrin e Maqedonisë së Veriut, e cila u kundërshtua nga VMRO-DPMNE në opozitë, që mbështet kandidaten Gordana Siljanovska Davkova.
“Jam i bindur se në raundin e 2 do kemi një president europian për shtetin tonë”, tha kryeministri Zaev. Me sa duket, ai beson se edhe opozita shqiptare do votojë këtë radhë për kandidatin pro europian, Stevo Pendarovski.