Lulzim Basha dhe Gjergji Hani, janë kandidatët që do të përballen për të qenë kryetar i ri i PD-së së vulës. Enkelejd Alibeaj, i pyetur nga gazetarët se përsë nuk është pjesë e garës, ai tha se sfidën e vet e kaloi me sukses dhe që mbajti gjallë PD-në. “Mund ta them me plotë gojën që sfida ime ka qenë shumë e suksesshme, sa kohë që kishim luftë nga dy anë, sfida ishte që PD të dilte e gjallë, dhe të kishte koshiencë, e ndryshuar në mentalitet dhe e aftë për të parë në sy gabimet”,-tha Alibeaj.
I pyetur se përse shumica e grupit parlamentar demokrat punoi për të sjellë sërish Lulzim Bashën në krye të PD-së, që ka dorëzuar kandidaturën për të drejtuar sërish partinë, Alibeaj tha se “deputetët janë shpirtra të lirë”. Në deklaratën e tij, ruajti tonet e qeta, duke u shprehur se “kjo është shenjë e mirë që do të tregojë se demokratët do të vlerësojnë vetë procesin”.
“Partia nuk është grupi parlamentar. Grupi parlamentar është pjesa më e përzgjedhur e partisë që ka një mision. Nuk ka të drejtë të ndërhyjë në procesin organizativ të partisë. Çdokush ka të drejtën të bëjë zgjedhjen e tij. Nuk është çështje numrash, është çështje vlerash. A nuk do të ishte një shenjë e mirë që t’ia lemë demokratëve ta vlerësojnë në një proces të ndershëm dhe të barabartë. Ne kemi një detyrë si PD, që zëri i secilit prej tyre të dëgjohet”.