Zhvillimet dramatike në Rusi, me ushtrinë e Prigozhinit që tashmë ka pushtuar Rostovin, duke kërcënuar me grusht shteti, kanë shkaktuar alarm në qeverinë e Putinit. Në këtë kontekst, presidenti rus pritet t’i drejtohet popullit rus të shtunën në mëngjes.
Këtë e ka konfirmuar zëdhënësi i Kremlinit Dmitry Peskov në një deklaratë për Ria Novosti. “Po, së shpejti do të ketë një mesazh nga presidenti”, tha ai.
Ministria e Mbrojtjes për luftëtarët e Wagnerit: Prigozhin ju mashtroi, kthehuni në bazat tuaja
Ministria u bën thirrje që të kthehen në bazat e tyre, duke theksuar se “garanton sigurinë e të gjithëve”.
“Ata ju mashtruan në aventurën kriminale të Prigozhin dhe pjesëmarrjen tuaj në rebelimin e armatosur. Shumë nga shokët tuaj nga njësi të ndryshme e kanë kuptuar tashmë gabimin e tyre, duke kërkuar ndihmë për të siguruar një kthim të sigurt në vendet e tyre të vendosjes së përhershme. Një ndihmë e tillë nga ana jonë tashmë është dhënë për të gjithë luftëtarët dhe komandantët që e kanë kërkuar. Ju lutemi ushtroni maturi dhe kontaktoni përfaqësuesit e Ministrisë së Mbrojtjes Ruse ose agjencitë e zbatimit të ligjit sa më shpejt të jetë e mundur. Garantojmë sigurinë e të gjithëve”, thuhet në njoftim.