Disa ditë pasi Qeveria e Kosovës shpalli si organizata terroriste, “Mbrojtjen Civile” dhe “Brigadën e Veriut” dy grupe që besohet se veprojnë në veri, Lista Serbe ka kaluar në veprim.
Partia kryesore e serbëve në Kosovë, ka kërkuar nga Qeveria në Beograd që të shpallë njësitë speciale të Policisë së Kosovës, strukturat e inteligjencës dhe të gjithë “bashkëpunëtorët e tyre” si organizata terroriste pasi kërcënojnë paqen në veriun e Kosovës. Në letër thuhet se populli serb po vuan nga terrori dhe represioni i regjimit antiserb të Albin Kurti, prej dy vitesh.
“Ne thellësisht besojmë se ky vendim në bashkëpunim me institucionet ndërkombëtare dhe partnerët perëndimorë, do të parandalonte aktivitetet e mëtejme të paligjshme të këtyre formacioneve për të kërcënuar paqen në veri. Po ashtu, do të krijonte bazë ligjore për veprimet e të gjitha autoriteteve shtetërore kundër këtyre organizatave që t’i sjellin ato para drejtësisë”, thuhet në letrën e Listës Serbe dërguar Qeverisë në Beograd.