Ambasadori i Gjermanisë në Tiranë, Peter Zingraf do të largohet nga Shqipëria për të marrë një detyrë re, pas përfundimit të mandatit 4-vjeçar si ambasador në vendin tonë. Në pritjen e tij të lamtumirës, ai falenderoi të gjithë partnerët dhe miqtë kombëtarë dhe ndërkombëtarë për bashkëpunimin e shkëlqyer, dhe të gjithë shqiptarët për mikpritjen e tyre. Gjatë fjalës së tij, Zingraf vlerësoi se për 4 vite rresht ai dhe bashkëshortja e tij janë ndier në Shqipëri njësoj si në shtëpinë e tyre.
“Këtu në mes të qytetit, rrethuar drejtpërsëdrejti prej zhurmave të jetës së përditshme të këtij qyteti miqësor dhe shumëngjyrësh. Larmia e kulturës, historisë, peizazheve dhe besimeve fetare të Shqipërisë na kanë pasuruar shumë”, vlerësoi ai.
Zingraf çmoi bashkëjetesën paqësore dhe tolerancën mes besimeve fetare si një arritje të madhe, për të cilën Shqipëria mund të jetë krenare, dhe të cilën shqiptarët me siguri do ta mbështesin dhe mbrojnë në mënyrë aktive. “Shqipëria dhe rajoni i saj janë pjesë e palëvizshme hartës politike evropiane, bisedimet e anëtarësimit po realizohen, në Tiranë është zhvilluar një samit i BE-së me Ballkanin Perëndimor, pas verës do të kemi kënaqësinë e Ministerialit dhe Samitit të Procesit të Berlinit”, evidentoi ai.
Sipas tij, “Gjermania dhe Shqipëria janë sot më të lidhura se kurrë dhe në shumë qytete gjermane ka fluturime direkte, turistë gjermanë janë duke ardhur në shifra të mëdha si vizitorë kureshtarë dhe të hapur”. Zingraf siguroi se “Gjermania do të vazhdojë të punojë në mënyrë aktive këtu në vend për përmirësimin e kushteve të jetesës për të gjithë shqiptarët e në mënyrë të veçantë në përmirësimin e mundësive të të rinjve dhe atyre në zonat rurale”.