Kreu i Komunës së Pejës, Gazmend Muhaxherri nuk e mbështet vendimin e kryeministrit të Kosovës Albin Kurti, i cili refuzoi të takohet me kryeministrin Rama nesër në Prishtinë.
Gjatë intervistës në “Special Report”, Muhaxherri tha se veprimet e Kurtit po e vënë në rrezik serioz sigurinë dhe të ardhmen e vendit.
“Nuk është e mirë për një kryeministër të Kosovës për të mos pritur një kryeministër shqiptar dhe për të mos bashkërenduar veprimet, që duhet t’i marrim bashkërisht si dy shtete. LDK është për të krijuar një front të përbashkët me shoqërinë civile për mbrojtjen e shtetit, sepse po shihet se nga veprimet e fundit shteti është vendosur në sanksione dhe po shkojmë drejt rrezikimit të sigurisë dhe të ardhmes tonë”, tha ai.
Sa i takon takimit të Osmanit me kryeministrin Rama, Muhaxherri u shpreh se: “Besoj se do të ketë një dakordësi, ose një përafrim të qëndrimeve për të shpëtuar atë që mundet të shpëtohet kur vendi po rrëshqet drejt sanksioneve ndërkombëtare. Unë po mendoj se llogarit e tij janë të gabuara dhe po nxit tensione të panevojshme dhe qëndrimi i tij nuk po ndërron dhe shohim se në ditët në vijim se çfarë reagimi do ketë”.