Pasditen e kësaj të enjte, prej orës 18.00 deri në orën 19.00 opozita i ka bërë thirrje qytetarëve të bllokojnë pesë akset kryesore në vend, si një mënyrë e përshkallëzimit të protestës. Kjo u vendos dy ditë më parë në mbledhjen e Kolegjit të Kryetarëve.
Në Tiranë do të bllokohet rrethrrotullimi “Shqiponja”, në aksin Durrës- Kavajë rruga Plepa- autostradë. Në Elbasan do të protestohet në rrethrrotullimin e Bradasheshit, ndërsa në Shkodër autostrada e Milotit dhe në Fier, rrethrrotullimi i Sheqit.
Protestat e sotme të opozitës vijnë 48 orë pas një marrëveshjeje të gjerë, ku koalicioni opozitar firmosi për të mos hyrë në zgjedhjet vendore pa largimin e Kryeministrit Rama dhe krijimin e një qeverie tranzitore. Kryetari i opozitës, Lulzim Basha, është shprehur i bindur se në 30 qershor nuk do të ketë zgjedhje, pasi opozita nuk do të lejojë më që të ketë procese farsë të diktuara nga krimi.