Një zjarr ka përfshirë mëngjesin e sotëm një lokal në tarracën e katit të katërt të Gjykatës së Lartë në Tiranë, duke shkaktuar panik tek qytetarët. “Tirana News”, raporton se në vendngjarje janë shërbimet e Policisë dhe ato të zjarrfikëses, të cilat po punojnë për fikjen e zjarrit.
Po ashtu ka edhe prezencë të autoambulancës. Në aksion u angazhuan 2 mjete dhe 10 forca zjarrfikëse. Ngarkesa nga kondicionerët dyshohet të jetë bërë shkak për rënien e zjarrit në lokalin në tarracën e Gjykatës së Lartë, ku fatmirësisht nuk pati dëme në njerëz.
“Më datë 20.07.2023, rreth orës 08:05, në kryqëzimin e rrugës “Myslym Shyri” me rrugën “Ibrahim Rrugova”, në një lokal në tarracën e katit të katërt të Gjykatës së Lartë, ka rënë zjarr. Në vendngjarje ndodhen shërbimet e Policisë dhe ato të zjarrfikëses, të cilat po punojnë për fikjen e zjarrit. Grupi hetimor po punon për sqarimin e rrethanave të ngjarjes”,-njofton policia.
