Disa studentë të Universitetit të Mjekësisë po protestojnë këtë të enjte para Kuvendit kundër projektligjit që i detyron ata për të punuar 5 vite në Shqipëri, kjo në mënyrë që të marrin diplomën. Studentët kanë firmosur një peticion nga grupet e interesit dhe duan anulimin e projektligjit. Po ashtu thirrja e tyre është që duhet të vendosë Drejtësia për këtë çështje.
Ata paralajmëruan se do ta çojnë ligjin në çështjen në Gjykatën Kushtetuese. “Do ta çojmë në gjykatën Kushtetuese! Kur të dorëzohet do të kuptohet se studentët do të bojkotojnë nisjen e vitit akademik”,–u shpreh një studente.
Me megafon, studentët kanë bërë thirrje në kor, përmes disa vargjeve kundër qeverisë.
“Parlamentit i bëjmë thirrje; ne studentët duam zgjidhje, nuk pranojmë në internim
Koston e mban veç prindi im
mos u dehni nga marria
lini të vendosë drejtësia
nuk kam borxhe për të larë
s’jam i ulët e as tradhtar
nuk do të ngrihem për të ikur
por për shpresën që na keni fikur!
