Kryeministri Edi Rama gjatë fjalës së tij pas mbledhjes informale të qeverisë që po realizohet në Tepelenë, u shpreh se fokusi i takimit ka qenë vetëreformimi i qeverisjes.
Sipas tij vetereformimi nuk lidhet vetëm me emra njerëzish apo emërimi apo shkarkim ministrash, por sipas tij qëllimi është rikonceptimi i procesit qeverisës për të rritur eficencën në shërbim të qytetarëve.
“Kemi gjithmonë tendencën ti lidhim reformat me njerëz dhe personal, por me lirime apo emërime apo me shkarkime.
Por, vetëreformimi është shumë më i gjere se kaq, rikonceptim i procesit qeverisë në funksion të rritjes së eficencës për të arritur rezultate më të qëndrueshme në kushtet ku ndodhet sot Shqipëria.
Siç kemi bërë edhe në të shkuarën. Në fund të një sesioni, në përgatitje të një sesioni tjetër është diskutuar shumë hapur dhe me shumë debat mbi problematikat. Është bërë një analizë e arritjeve, por duke i parë arritjet jo nga këndvështrimi i të djeshmes, por nga pikëpamja e të ardhmes, pra me sy kritikë. Po ashtu është riparë dhe mundësia për të riorganizuar të gjithë procesin qeverisës duke filluar nga vetë organizimi i këtij procesi në godinën e qeverisë.
Besoj që kemi arritur disa rezultate të dobishme. Kemi vendosur disa piketa të rëndësishme në mënyrë që sesionin e ri ta fillojmë me një kurs të ri, por edhe me një rritje të konsiderueshme të kapaciteteve qeverisëse duke forcuar shumë rolin e zv.ministrave, por edhe duke përfshirë në vendim-marrje dhe në proces edhe të tjerë drejtues të agjencive të rëndësishme. Ndërkohë që do të krijojmë një kanal të ri ndërveprimi me ekspertizën vendase dhe të huaj, me botën akademike, me organizatat ndërkombëtare, por edhe me individë që kanë çfarë të na mësojnë qoftë brenda, qoftë jashtë vendit”, tha Rama.