Është dashur një konferencë në Slloveni që të “shkrijë akujt” mes kryeministrit Edi Rama dhe homologut të Kosovës, Albin Kurti. Ata kanë shtrënguar duart teksa ishin të ftuar në darkën e mikpritjes së Kryeministrit të Sllovenisë, Robert Golob, me kolegët e rajonit në vigjilje të Forumit Strategjik të Bledit. E pranishme në këtë darkë mes liderëve të tjerë është edhe kryeministrja e Serbisë, Ana Bërnabiç, kryeministri i Maqedonisë së Veriut.
Marrëdhënia mes Kurtit dhe Ramës kanë qenë mjaft e tensionuar, madje shumë herë të dy kanë shkëmbyer replika në distancë, ndërsa homologu i tij i Kosovës refuzoi ta takojë kur Rama shkoi në Prishtinë për ta njohur me draftin për asociacionin e komunave në veri që siç tha ia kishte prezantuar kancelarit gjerman Olaf Scholz dhe presidentit të Francës Emanuel Macron.
Konferenca e 18-të ndërkombëtare e Forumit Strategjik të Bled zhvillohet më 28 dhe 29 gusht 2023 nën titullin “Solidariteti për Sigurinë Globale” dhe do të jetë forumi më gjithëpërfshirës dhe përfaqësues global deri më tani. Forumi Strategjik Bled është një projekt ndërqeveritar i Republikës së Sllovenisë, i organizuar nga Ministria e Punëve të Jashtme dhe Evropiane dhe Qendra për Ardhmërinë Evropiane.
Këtë vit për herë të parë transporti hekurudhor falas do të jetë i disponueshëm për pjesëmarrësit e konferencës në linjën Lubjanë-Lesce. Autobusët e përbashkët të transportit do të organizohen nga stacioni i trenit Lesce në vendet e konferencave në Bled.
Forumi i sivjetshëm si në aspektin e përmbajtjes ashtu edhe të pjesëmarrjes, pasqyron aspiratat e Sllovenisë si një anëtare jo e përhershme e Këshillit të Sigurimit të Kombeve të Bashkuara (KSKB) për vitin mandatar 2024-2025. Titulli i Forumit, “Solidariteti për Sigurinë Globale”, është një vazhdim kuptimplotë i sloganit të fushatës së Sllovenisë për KS të OKB-së, “Ndërtimi i besimit – Sigurimi i së ardhmes”.