Ministri i Brendshëm, Taulant Balla, nëpërmjet një postimi në rrjetet sociale ka bërë me dije se është njohur me një postim në tik tok ku një person duket se i jep një të mituri një cigare hashash.
Ai ka njoftuar me njëherë Drejtorin e Përgjithshëm i cili ka vënë në lëvizje strukturat, ku është bërë e mundur identifikimi dhe ndalimi i të riut.
“Mirëmbrëma, jam njohur sot pasdite me një video skandaloze ku një person i papërgjegjshëm duket se i ofron një cigare (të dyshuar hashash) një të mituri. Menjëherë i kam kërkuar Drejtorit të Përgjithshëm të Policisë së Shtetit identifikimin e këtij personi dhe më pas Policia ka bërë të mundur ndalimin e tij të menjëhershëm dhe shoqërimin në Komisariatin e Kurbinit, i akuzuar për nxitje të përdorimit të lëndëve narkotike në rrethana rënduese”, u shpreh Balla.