Media gjermane “Frankfurter Allgemeine Zeitung”, i ka kushtuar një artikull çështjes së Fredi Belerit dhe raportit Greqi-Shqipëri. Ndër rrjeshta shkruhet se kryeministri Edi Rama akuzohet nga Athina se ka nevojë për një ndjekës besnik politik në komunitetin himarjot që të mund t’u kalojë pronat më tërheqëse miqve të tij të politikës dhe të biznesit. Po ashtu, shkruhet edhe se qeveria në Athinë kërcënon herë indirekt e herë më qartë se bisedimet për anëtarësimin e Shqipërisë në BE, të cilat janë ende në fillim, do të bllokohen nëse Beleri nuk lirohet. Pas vetos së Bullgarisë kundër Maqedonisë së Veriut, kjo do të ishte bllokada e radhës kundër një vendi në procesin e zgjerimit të BE-së në rajon.
“Kryeministri i Greqisë, Mitsotakis është në sherr me kryeministrin shqiptar, Rama. Por kjo mund të ketë implikime të mëdha për politikën e jashtme të Shqipërisë. Sipas interpretimit të Tiranës, mungesa e respektit të Greqisë për pavarësinë e gjyqësorit shqiptar është shkaku i konfliktit. Sipas interpretimit të Athinës, trajtimi i Shqipërisë ndaj minoritetit grek të vendit është thelbi i çështjes. Rama kundërshton se drejtësia në Shqipëri është e pavarur dhe se ai nuk ka asnjë lidhje me këtë çështje.
Pretendimi i tij se ai nuk kishte asnjë lidhje me këtë çështje do të ishte më bindës nëse Rama nuk do ta kishte denoncuar Belerin si “llum” apo “analfabet” gjatë fushatës zgjedhore. Një vëmendje e tillë ishte befasuese, pasi Himara nuk ka as 8000 banorë dhe për këtë arsye nuk është “e madhe” as për standardet shqiptare.
Ka të paktën dy përgjigje për pyetjen se pse kryeministri i një shteti punon kaq intensivisht kundër kandidatit për kryetar bashkie të një qyteti provincial. Njëra është se Beleri iu bashkua një koalicioni rreth ish-presidentit shqiptar Sali Berisha në fushatën e tij zgjedhore. Ai është edhe paraardhës i Ramës si kreu i qeverisë dhe konsiderohet armiku i tij. Një lloj lufte me prokurë u bë mes Berishës dhe Ramës në Himarë”,-theksohet në artikull.