Dy administratorë kanë rënë në pranga, ndërsa dy të tjerë janë shpallur në kërkim nën akuzën e mashtrimit për investim në bursa përmes Call Centerave. Policia e Shtetit njofton se janë sekuestruar 68 mijë euro të cilat ishin përftuar përmes mashtrimit si dhe listat me emrat dhe numrat e telefonave e shtetasve të huaj që ranë në grackën e tyre.
Në Call Centerin në fjalë që ndodhej në Tiranë në rrugën e Zallit, ishin punësuar 60 operatorë të cilët mashtronin të huaj për investim në Forex.
Gjatë operacionit u gjetën dhe u sekuestruan në cilësinë e provës materiale: 68 000 euro, njësi kompjuterike, aparate celulare, tabletë, mandate pagesash dhe blloqe me të dhëna të ndryshme të shtetasve të huaj që dyshohet se janë mashtruar, për të investuar në bursa fiktive.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.