Një burim i lartë nga Ministria e Punëve të Brendshme të Serbisë, ka thënë për ‘The Geopost’ se dikush nga Manastiri i Banjskës e ka tradhëtuar presidentin serb, Aleksandër Vuçiç.
“Dje dikush e tradhtoi presidentin Vuçiç dhe shërbimet e inteligjencës serbe do ta hetojnë këtë”, mësohet të ketë thënë burimi.
Sipas tij, Vuçiç është tradhtuar në lidhje me rezistencën në Banjskë.
“Të paktën 6 serbë janë vrarë. Aksioni nuk duhej të përfundonte kështu, me këtë bilanc. Kjo e dëmton shumë Vuçiçin dhe institucionet e Serbisë, serbët e Kosovës dhe pozitën e Serbisë në dialog”, ka thënë burimi nga strukturat e sigurisë serbe.
Kujtojmë se mëngjesin e të dielës së 24 Shtatorit, në fshatin Banjskë, serbët e armatosur kanë vrarë policin kosovar Afrim Bunjaku. Më pas, njësitet speciale të Policisë së Kosovës neutralizuan terroristët, të cilët ishin strehuar në Manastirin Ortodoks të fshatit.
Gjatë aksionit janë vrarë të paktën 4 serbë, për të cilët thuhet se janë serbë të Kosovës, ndërsa 2 të tjerë janë kapur të gjallë.
Ndërsa presidenti serb Vuçiç, në një konferencë për mediat, mbrëmjen e djeshme fajësoi për sulmin kryeministrin kosovar, Albin Kurtin./ The Geopost