Shkencëtarët e NASA-s hapën kapsulën e misionit OSIRIS-REx që mbërriti në Tokë të dielën (24/9), pas shtatë vitesh, me mostra nga asteroidi “më i rrezikshëm” Bennu në sistemin tonë diellor.
Procesi për mbledhjen e sigurt të mostrës së çmuar të asteroidit nga kapsula është në lëvizje të plotë. Sipas agjencisë amerikane të hapësirës, shkencëtarët duke hapur kapakun e kapsulës gjetën “pluhur të zi dhe mbeturina në madhësinë e kokrrave të rërës”, pa hapur ende kontejnerin kryesor.
Kapsula është dërguar në Qendrën Hapësinore Johnson të NASA-s, ku kapaku i saj është hapur brenda një zone të veçantë për të siguruar që nuk do të ketë ndotje.
NASA tha se materiali do t’i nënshtrohej një “analize të shpejtë” për të parë se çfarë saktësisht është, pa shpjegime të mëtejshme.
Kapsula ka rreth 250 gram material të pacenuar nga asteroidi Bennu, koleksioni më i madh i materialit kozmik jashtë Hënës.
Ekipi shkencor hoqi kapakun e kontejnerit, duke zbuluar pluhurin e errët dhe grimcat e madhësisë së rërës brenda, të cilat ka të ngjarë të vinin gjithashtu nga asteroidi.