Sulmi terrorist që i mori jetën policit në Veriun e Kosovës, për Sali Berishën ka një sfond të parapërgatitur nga Edi Rama dhe presidenti serb, Aleksandër Vuçiç. Në konferencën e përjavshme me gazetarët, duke cituar burime nga Kombet e Bashkuara, Berisha tha se në sallat e kësaj selie në New York u mbajt një takim jo publik.
Në këtë takim, siç deklaroi Berisha, u takuan dy kryeministra përveç atij të Serbisë dhe u paraqitën kërkesa që komunat me shumicë serbe në veriun e Kosovës, të vendosen nën kontrollin e KFOR-it. Teksa thekson se burimet nuk i dhanë emra konkretë, Berisha, shpjegon se përse mund të dalë emri i kreut të qeverisë.
“Pse del Edi Rama, thoni ju? Edi Rama del se me datën 24 shtator, në orën 11, sapo u mor vesh vrasja e policit në krye të detyrës, Edi Rama vrapoi me të madhe të kërkojë konferencën ndërkombëtare për Kosovën”,-tha Berisha.