Ish-ministri i Brendshëm, Sandër Lleshaj pohon se Shqipëria duhet ta kuptojë mirë rolin që ka lidhur me tensionet mes Kosovës dhe Serbisë.
Sipas tij, vendi ynë nuk duhet të qëndrojë indiferent ndaj asaj ç’ka po ndodh në Veri, por ka detyrimin ta mbështesë Kosovën.
“Ka ngjashmëri me atë që ndodhi në Krime në 2014-ën. Për mua është përtej terrorizmit, është më keq se ajo. Ky ishte një sulm i mirëfilltë ushtarak që nuk funksionoi. Vrasja e një polici nuk është terrorizëm. Sulmi u përkufizua keq. Thelbi i tij është pak më shumë. BE nuk është ende në gjendje as ta njohë Kosovën si shtet të pavarur për sa kohë ka ende shtete anëtare të tij që nuk e njohin. KFOR nuk i merr kujt leje për zonën që kontrollon në Kosovë. Nuk shoh ndonjë vlerë të shtuar përpos retorikës te kërkesa e Ramës për ta. KFOR meriton kritikë se si ka mundësi të jetë indiferent për një arsenal të tillë ushatarak brenda Kosovës, që nuk besoj të jetë i vetmi. Shqipëria duhet të kuptojë mirë rolin që ka. Nuk kemi luksin për t’u sjellë në mënyrë indiferente ndaj Kosovës. Kosova e di vetë se çfarë do, askush veç tyre nuk mund ta dijë. Roli ynë është t’i mbështesim ata. Shqipëria ka detyrë vetëm të pyesë se çfarë u duhet dhe më pas t’i ndihmojë Kaq Shqipëria mund t’i ndihmonte vetëm duke u dalë në krahë, në të mirë e në të keq. tensioni mes Ramës dhe Kurtit nuk duhet të ekzistojë. Kosovës i duhet shkuar nga pas në këtë rrugëtim. Edhe nëse ata zgjedhin rrugën jo të duhur. Ne nuk dimë më mirë se ata në lidhje me këtë rrethanë. Kosova nuk vuan për talente, por për fuqi. Edhe përpjekja për draftin ishte e padobishme, sepse nuk vuan njeri nga mungesa e draftit”, u shpreh Lleshaj gjatë një interviste në “News24”.