Mediat greke kanë zbardhur të tjera detaje në lidhje me 4 shqiptarë të komunitetit rom, të cilët u arrestuan nga policia helene si autorë të vrasjes së një 54-vjeçari grek, roje në një park fotovoltaik, në muajin korrik.
Në fotot e publikuara nga protothema.gr disa nga autorët e dyshuar shfaqen të ulur në një kafene në Patisia pak orë pas krimit.
Në këtë kafene njëri prej tyre ka bërë gabimin fatal. Ai ka marrë vendimin që të hedhë celularin e viktimës në rrugë.
Disa orë më vonë pasi ata ishin larguar nga dyqani, celulari u pikas nga një burrë që kalonte jashtë dyqanit. Ai pa se telefonata e fundit ishte nga një grua. Ishte gruaja e 54-vjeçarit. Ai telefonoi numrin dhe dëgjoi nga linja tjetër një zë gruaje që i thoshte se burri i saj ishte viktimë e një sulmi dhe se celulari ishte i tij.