“Sulmi me raketa ruse që vrau 51 civilë ka prekur çdo familje në fshatin verilindor të Ukrainës, Hroza”, tha ministri i Brendshëm i Ukrainës. Në momentin që një kafene u godit nga raketat, në mesin e viktimave ishte dhe një fëmijë 6-vjeçar.
Ministria e Mbrojtjes e Ukrainës ka fajësuar Rusinë teksa tha se nuk kishte objektiva ushtarakë në atë zonë. Nga ana tjetër, Rusia nuk e ka komentuar drejtpërdrejt sulmin, por Agjencia Shtetërore e Lajmeve ruse, “Ria Novsti”, raportoi se ushtria ruse kishte kryer 20 sulme ajrore dhe artilerie ndaj objektivave ukrainase në rrethin Kupyansk, ku ndodhet fshati Hroza.
Nuk u tha se kur u kryen goditjet ekzaktësisht, gjithashtu në raportim nuk përmendet fshati Hrozë. Kur raketa goditi fshatin Hrozë, civilët ishin mbledhur pasi kishin marrë pjesë në funeralin e një ushtari ukrainas, i cili ishte po ashtu një banor vendas.