Erica Robin, një e krishterë nga qyteti i Karaçit, do të përfaqësojë Pakistanin thellësisht konservator në konkursin e bukurisë ”Miss Universe”. 24-vjeçarja u zgjodh ”Miss Universe Pakistan” nga pesë finalistet në një konkurs të mbajtur në Maldive.
“Ndihem mirë të përfaqësosh Pakistanin. Por nuk e kuptoj se nga vjen reagimi. Mendoj se është kjo ide që unë të parakaloj me rroba banje në një dhomë plot me burra”, tha Robin për BBC.
Ata që kritikojnë nominimin e saj thonë se ajo po përfaqëson një vend që nuk dëshiron të përfaqësohet, veçanërisht pasi konkurset e bukurisë janë të rralla në Pakistanin me shumicë myslimane.
Robin kujtoi se gjatë raundit të dytë përzgjedhës të konkursit që u mbajt në Zoom, asaj iu kërkua të përmendte një gjë që donte të bënte për vendin e saj. “Dhe unë u përgjigja, do të doja të ndryshoja këtë mentalitet se Pakistani është një vend i prapambetur”, tha ajo. Kjo mund të jetë e vështirë, duke pasur parasysh disa nga përgjigjet armiqësore ndaj emërimit të saj.
Senatori Mushtaq Ahmed i partisë Jamaat-e-Islami e quajti atë “të turpshme”. Kryeministri në detyrë Anwar ul-Haq Kakar madje urdhëroi një hetim. Biseda në internet midis burrave pakistanezë në veçanti ka qenë rrëqethëse.