Rruga Qafa e Buallit-Krastë prej shumë vitesh është në gjendje kritike. Madje herë pas here edhe për shkak të dëmtimit të trasesë kanë ndodhur aksidente të shumta. Banorët e Martaneshit e kanë pagëzuar këtë segment si “rruga e lapidarëve”, të cilët faktojnë se janë regjistruar ngjarje tragjike.
Mësohet se pas rreth 30 vitesh, rruga që lidh Bulqizën me Martaneshin është në prag të një investimi, për ta shtruar atë me asfalt. Ky segment rrugor, me një gjatësi prej 16.5 km, ka pësuar amortizim të konsiderueshëm disavjeçar, si rezultat i përdorimit nga mjetet e rënda të ngarkuara me krom dhe mungesës së mirëmbajtjes.
Referuar Autoritetit Rrugor Shqiptar, rruga do të përmirësohet dhe do të përfshihet në kategorinë C3 të rrugëve interurbane dytësore. Operatorët ekonomikë kanë afatin deri më 15 nëntor 2023 për të dorëzuar ofertat e tyre. Kontrata për këtë projekt pritet të ketë një afat ekzekutimi prej 18 muajsh, ndërsa vlera e fondit limit për këtë investim pritet të jetë rreth 10.3 milionë euro.