Disafatë ka pësuar partia e kryeministrit grek Kyriakos Mitsotakis, “Demokracia e re”, në raundin e dytë të zgjedhjeve lokale që u zhvilluan ditën e dielë. Nga numërimi i 95% të kutive të votimit, partia e kreut të qeverisë ka humbur bashkitë e Athinës dhe Selanikut, dy më të mëdhatë e vendit.
Për bashkinë e Athinës, fitues është shpallur Haris Dukas i mbështetur nga PASOK. Ai ka marrë rreth 55.9% të votave kundrejt 44.01% të kryebashkiakut aktual, Kostas Bakojanis i “Demokracisë së re.
Në Selanik, fitues me 67% të votave u shpall, Stelios Angeloudis, që kandidoi si i pavarur, por i mbështetur nga PASOK. Ai mundi Konstantinos Zervas, të mbështetur nga qeveria.
Pas publikimit të këtyre rezultateve, kryeministri Kyriakos Mitsotakis pranoi disfatën dhe u angazhua se do të bashkëpunojë dhe me krerët e bashkive që nuk u fituan prej tij.