Partia Demokratike, në bashkëpunim me aleatët e saj, po punon për hartimin e një platforme të detyrave që do të ketë qeveria tranzitore.
Duke e cilësuar si kusht të panegociueshëm për të hyrë në zgjedhjet vendore krijimin e një qeverie tranzitore, demokratët janë duke punuar dhe do të prezantojnë detyrat që do të ketë kjo qeveri.
Sipas burimeve nga grupi i punës që është duke punuar për këtë platformë, detyra kryesore që do të ketë kjo qeveri e mandatuar me konsensusin e të gjithë aktorëve politikë do të jetë përgatitja e zgjedhjeve të parakohshme.
Demokratët pritet të kërkojnë që kjo qeveri të punojë me një afat 3-6 muaj deri në zhvillimin e zgjedhjeve. Gjithashtu, pritet që të kërkohet për depolitizim të komisioneve zgjedhore. Në fokus të qeverisë tranzitore do të jetë edhe miratimi i Kodit të ri Zgjedhor, nga i cili, aktualisht, për shkak të lënies së mandateve, janë të përjashtuar PD dhe LSI.
Demokratët, përmes prezantimit të detyrave të qeverisë tranzitore, do të kërkojnë të tregojnë se beteja e tyre është bërë jo për të marrë pushtet në tavolinë, por për të instaluar në vend një demokraci europiane. Disa ditë më parë, Basha prezantoi edhe pikat e forta që do të ketë qeveria e demokratëve pasi të marrë besimin e shqiptarëve.
Basha deklaroi se sektori i shëndetësisë do të jetë prioritar gjatë qeverisjes së PD-së, duke premtuar rroga minimale 700 euro për infermierët dhe 1200 euro për mjekët.
Gjithashtu, demokratët kanë premtuar se do të anulojnë të gjithë koncesionet korruptive në sektorin e shëndetësisë dhe do të rrisin shpenzimet për rikonstruksionin e qendrave spitalore dhe shtimin e stafeve mjekësore. Po ashtu, Basha ka premtuar se gjatë qeverisjes së demokratëve, do të rritet edhe vlera e rimbursimit të medikamenteve.