Presidenti i SHBA Joe Biden gjatë vizitës në Izrael mori premtimin për lejimin e ndihmave humanitare në Gazën e rrethuar nga ushtarët izraelitë.
“Izraeli është pajtuar që ndihmat humanitare të fillojnë të futen nga Egjipti në Gaza”, tha lideri amerikan gjatë vizitës në shtetin hebre, teksa i bëri sërish thirrje Benjamin Netanyaho-s të mos përpihet nga zemërimi, por të respektojë ligjet e luftës.
Nga ana tjetër, pas vizitës së mbushur me diskutime për situatën e rënduar Izrael-Hamas, Biden premtoi 100 milion dollarë ndihmë humanitare për Rripin e Gazës dhe Bregun Perëndimor. Presidenti ritheksoi angazhimin e administratës së tij për paqen midis Izraelit dhe palestinezëve, duke i lejuar dy popujt të jetojnë në siguri dhe dinjitet.
Sa i përket për spitalit të goditur mbrëmjen e së martës në Gaza, presidenti amerikan konfirmoi se nuk ka ndodhur nga Izraeli, por nga Xhihadi Islamik, ku sipas tij godina u godit nga një raketë e devijuar e organizatës terroriste.
“Jam thellësisht i trishtuar nga shpërthimi në spitalin e Gazës një ditë më parë. Bazuar në ato që pashë, duket se kjo është bërë nga krahu tjetër, jo nga ju”, tha Biden.
Të shumta kanë qenë reagimet ndërkombëtare për sulmin mbi spitalin në Gaza, ku të paktën 500 persona kanë humbur jetën. Deklarata e Biden është mbështetur nga Forcat e Izraelit të cilët gjithashtu kanë publikuar provat, ku shpjegojnë hap pas hapi të gjithë intenrarin, njëkohësisht më e rëndësishmja është përgjimi i publikuar ku dy militantë të Hamasit mund të dëgjohen duke diskutuar mbi shpërthimin dhe teksa konfirmojnë se raketa erdhi nga Xhihadi Islamik Palestinez.
Zyrtarët publikuan gjithashtu një video të momentit kur një raketë, që supozohet se vinte drejt Izraelit nga Gaza, dhe në një moment ka pasur probleme e papritmas ka ndryshuar drejtimin.
Bota islame e ka dënuar sulmin e rëndë në spitalin Al-Ahli Arab, situatë që ngjalli protesta masive të dhunshme. Sipas protestuesve civilët nuk dihet të preken nga lufta dhe se shpërthimi në spital është një sulm i pastër terrorist.
Nga ana tjetër presidenti i Egjiptit, Abdel Fattah el-Sissi i kundërshtoi kategorikisht ato që i cilësoi si përpjekje për të detyruar palestinezët e Gazës të zhvendosen në Gadishullin Sinai. Përpjekje të tilla, paralajmëroi ai, do të vënë në rrezik paqen e Egjiptit me Izraelin, duke lënë të kuptohet se nuk do të hyjë në luftë me shtetin hebre.