Vetëm pak minuta pasi deputeti gjerman, Gynter Krishbaum tha se ndaj Sali Berishës rëndojnë akuza të rënda dhe se imuniteti mund të pezullohet nga autoritetet ligjzbatuese, ka ardhur dhe reagimi i ish-Kryeministrit. Përmes një konference online, Berisha paralajmëroi padi ndaj tij duke e akuzuar si gënjeshtar dhe i blerë.
“E garantoj Gunther Krichbaum se do i jap mundësi në sallën e gjyqit të justifikojë qëndrimin e tij amoral. Në një mashtrim publik para shqiptarëve, ka mbrojtur veprimin pa autorizimin e Parlamentit, të SKAP-it të partisë dhe gjykatëses së saj. Ky është një akt i padenjë, ky është mashtrim i një njeriu i paguar apo i papaguar, por që turpëron veten në radhë të parë.“
Për pretendimet e ngritura nga Krishbaum para gazetarëve, Berisha solli si referencë një nen të ligjit gjerman që tha se përcakton mënyrën e kufizimit të lirisë së deputetit.
“Kur ligji bazë i Gjermanisë, ka një nen i cili quhet neni 46, i cili shkruan se asnjë njeri, as arrestim dhe as kufizim lirie nuk mund të ndodhë ndaj një deputeti, pa autorizimin e parlamentit. I them Gunther Krichbaum, merr po deshe, meqenëse në aparancë paraqitesh si luftëtar i antikorrupsionit, provoje iniciativën e Sali Berishës të vitit 2012. Vjen dhe flet për ligjet naziste, duke aluduar, je një gënjeshtar, je një gënjeshtar. Për lidhjet tuaja me Lul Bashën ‘smund të mashtrosh e dizinformosh një popull të tërë.”
Duke e cilësuar politik procesin e nisur nga SPAK-u ndaj tij dhe Jamarbër Malltezit, Berisha vijoi sërish me akuza ndaj kryeministrit dhe SPAK-ut, teksa paralajmëroi betejë pa kthim në parlament dhe sheshe me qytetarët.