Deputeti socialist Petro Koçi ka reaguar pas dhunës fizike dje në Kuvend, mes deputetëve të PD-së dhe PS-së.
Në një postim në rrjetin social Facebook, ai shkruan se lëvizja haxhiqamiliste “Dum Babën” ka infektuar rëndë shumë parlamentarë të opozitës, ndërsa shton se opozita po tenton të zëvendësojë ballafaqimin politik civil me konfrontim fizik.
Ndër të tjera ai shprehet se kriza, frika, manovrat dhe dhuna e të korruptuarve nuk mund ta rrëzojnë këtë qeveri, referuar aksionit opozitar.
Postimi i plotë i Petro Koçit:
Levizja haxhiqamiliste “Dum Baben” ka infektuar rëndë shumën parlamentare të opozitës. Sulmojnë institucionet duke ëndërruar një grusht shteti kundër SPAK. Duke tentuar të zëvendësojnë ballafaqimin politik civil me konfrontim fizik dhe konkurrimin e alternativave me përleshje boksi, ata në fakt nuk po sulmojnë maxhorancën, por vetë shtetin, vetë Republikën.
Grabitja e Klubit Partizani, falsifikimi i dokumentave, përdorimi i pushtetit kryeministror për të legalizuar manovrat e përveshjes së trojeve publike në favor të familjarëve janë përgjegjësi penale të cilave nuk mund t’u shpëtosh me 14 shtatorë të rinj.
Sakrifica solide e ca deputetëve për të zgjidhur me mjete dhunë hallet personale të një kampioni të korrupsionit qeverisës kompromenton rëndë betimin e tyre kushtetues.
Drejtësia e re, e ngritur mbi gërmadhat e drejtësisë së vjetër, e cila varej nga çikllotë e politikës së korruptuar, ka mbështetjen e popullit pa dallim feje, krahine dhe ideje.
Kjo drejtësi e re mund të themi se po hedh themelet e një Republike të Re.
Koha e pandëshkueshmërisë prepotente ka marrë fund.
Kriza, frika, manovrat dhe dhuna e të korruptuarve nuk mund ta rrezojnë këtë Republikë të Re.
Republika e Re do të fitojë!