Derbi i Londrës mes Totenhemit dhe Çelsit ka qenë me të vërtetë i veçantë, pasi ka dhuruar një sfidë të rrallë sot në kampionatin anglez. Në fund kanë qenë blutë që kanë dalë triumfues, në një sfidë ku ndodhi gjithçka.
Armando Broja e pa këtë ndeshje si spektator, pasi nuk ishte në 18-shen e përzgjedhur nga trajneri Poçetino. Skuadra e tij në fillim shfaqi probleme pasi pësoi gol dhe ishte me fat që iu anulua një i dytë vendasve të Totenhemit.
Më pas e kishte radhën Sterling t’i anulohej gol, ashtu si edhe Kaisedos. Por në këtë rast të fundit, gjatë aksionit u vu re një ndërhyje e parregullt e Romeros, i cili u ndëshkua me të kuq teksa blutë fituan penalltinë me të cilën Palmer barazoi shifrat. Para fundit të pjesës së parë kishte kohë për një tjetër gol të anuluar të Xhekson.
Në pjesën e dytë, Totenhem u mundua të rezistonte ndaj sulmeve të bluve në inferioritet numerik, por Udogi shkatërroi gjithçka me kartonin e kuq të tij në minutën e 55-të. Vendasit rezistuan sa mundën, derisa në minutën e 75-të, Xhekson më në fund kaloi në avantazh Çelsin.
Ndërsa nga një anë Totenhemi pa t’i anulohej një tjetër gol dhe të shpërdoronte dy mundësi të mira për barazimin, nga ana tjetër Xhekson përfitoi nga hapësirat në mbrojtje në minutat shtesë për të tundur rrjetën edhe dy herë të tjera dhe vulosur fitoren 4-1 në këtë derbi të pazakontë.
TOTENHEM-ÇELSI 1-4
6’ Kulusevski / 35′(p) Palmer, 75′, 90’+4′, 90’+7′ Xhekson
