Komuniteti i komunës së vogël të Valle Vermenagna të Italisë, është i tronditur nga vrasja e Klaudio Myrtajt, muratorit 34-vjeçar shqiptar, i cili u qëllua me një plumb pistolete në kokë pasditen e së shtunës. Tragjedia ndodhi kur i zoti i punishtes u largua. Ishte një klient që e gjeti përtokë, me një plagë të rëndë në kokë. Klaudio ishte ende gjallë, por në agoni. Ai ndërroi jetë rrugës për në spital.
Hetuesit nuk përjashtojnë asnjë pistë. As atë të drogës, por kryesorja është ajo që lidhet me motive pasioni. Autoritetet e prokurorisë po vlerësojnë çdo hipotezë për të zbardhur vrasjen e shqiptarit. Pas vrasjes mund të qëndrojë edhe dora e një gruaje.
Zona ku ndodhi ngjarja nuk është e mbuluar me telekamera, megjithatë ka disa kamera sigurie që janë të vendosura në afërsi. Këto të fundit janë sekuestruar nga autoritetet.
“Ishte një djalë i mirë”, thonë ata që e njihnin. “Duket se është vrarë për xhelozi. Po ça kuptimi ka. Të vdesësh kështu në moshën 34-vjeçare. Këtu në Vernante nuk ka ndodhur kurrë diçka e tillë”, shprehen banorë të zonës për mediat fqinje.