Policia e Tiranës ka arrestuar dy vëllezër, pasi në banesën e tyre u sekuestrua një sasi lënde narkotike. Blutë e kryeqytetit njoftojnë se kanë sekuestruar rreth 8 kg kanabis në fshatin Bulçesh.
Në këto rrethana, janë arrestuar në kushtet e flagrancës dy vëllezërit Saimir Aruci, 39 vjeç dhe Oltjan Aruci, 25 vjeç, për veprën penale “Prodhimi dhe shitja e narkotikëve”.
“Specialistët e Seksionit për Hetimin e Narkotikëve dhe Trafiqeve, në bashkëpunim me specialistët e Sektorit për Hetimin e Krimeve të Rënda ndaj Personit dhe Pronës, bazuar në informacionet e siguruara nga inteligjenca policore, kanë organizuar operacionin policor të koduar ‘Bulçesh’. Gjatë operacionit është ushtruar kontroll në banesat e shtetasve S. A. dhe O. A. (vëllezër), në fshatin Bulçesh, Tiranë, dhe si rezultat është gjetur dhe sekuestruar një sasi lënde e dyshuar narkotike cannabis sativa, me peshë 7.9 kilogramë. Në vijim të veprimeve procedurale, u arrestuan në flagrancë shtetasit S. A., 39 vjeç dhe O. A., 25 vjeç, për veprën penale ‘Prodhimi dhe shitja e narkotikëve'”.