Gjykata e Apelit ka lënë në fuqi masën për pezullimin nga detyra të ish-Presidentit të Urdhrit të Stomatologut, Nikoll Deda.
Denoncimi për Dedën u bë nga një person me iniciale A.G, i cili e ka paditur që në janar të këtij viti për abuzime të kryera prej tij në emër të Udhrit të Stomatologut që datojnë që në vitin 2016.
Deda akuzohet për abuzime të shumta financiare, shkarkim të padrejtë të një punonjësi dhe punësimin e të fejuarave të djemve të tij në institucionin që drejtonte.
“Nga hetimet rezultoi se me veprimet/mosveprimet e tij, shtetasi N.D. ka krijuar një ‘klimë posedimi privat’ duke përqendruar në duart e tij funksionet e këshillave rajonale qoftë për sa i përket administrimit të buxhetit të urdhrit të stomatologut ne nivel qarku, qoftë përsa i përket pajisjes me licencë të stomatologeve për ushtrim individual profesioni.
Për më tepër, punësimi i të fejuarave të djemve të tij në Urdhrin e Stomatologut, apo fëmijëve të anëtarëve të Këshillit Kombëtar, janë thjesht tregues i personalizimit të ‘Urdhrit të Stomatologut’ nga shtetasi N.D., duke krijuar një klimë posedimi privat të këtij enti publik”, thuhet në njoftimin e Prokurorisë.