Aksi i ri Milot-Balldren dhe rruga Shëngjin-Velipojë do të jenë realitet në vitet në vijim, duke lehtësuar maksimalisht tensionin që krijohet me qarkullimin e mjeteve në këto dy akse të rëndësishme.
Kështu deklaroi sot Kryeministri Edi Rama, në një aktivitet të organizuar në Ishull Lezhë ku u prezantua kalendari i aktiviteteve kulturore dhe artistike për vitin 2019.
Rama informoi se “vetëm para pak ditësh përfunduam procedurën jo të lehtë të negociatave për të kontraktuar aksin e ri Milot-Balldren, i rëndësishëm për gjithë këtë zonë”.
Po ashtu, Kryeministri foli edhe për rrugën Shëngjin-Velipojë, për të cilën theksoi se “është gjetur financimi”.
“Ky është një projekt që do ta financojmë me Bankën Europiane për Rindërtim dhe Zhvillim dhe nevojat proceduriale kërkojnë edhe pak kohë, por besojmë se brenda pak muajsh do të përgatitet i gjithë dokumentacioni i nevojshëm për të zhvilluar garën”.
Rama siguroi se “ne do t’i japim Shëngjinit një frymëmarrje të re dhe mundësi shumë të mëdha”.