Për vrasjen e Liridonës, avokati Arbër Jashari ishte i pari që shkruante se nuk ishte një grabitje por vrasje e organizuar. Ai u shpreh se deklaratat e Naim Murselit ishin kontradiktore dhe se nuk kishin të bënin me një grabitje.
“Deklaratat e tij ishin tepër të kundërta dhe nuk përbënin vepër penale të grabitjes. Kam pasur dyshimet e mia duke u bazuar në deklaratat e tij dhe rrethanat konkrete. Mirëpo edhe nga doktrina juridike nuk kam pasur të vështirë të arrij në përfundimin se rasti i ngjante një vrasje sesa një grabitje. Grabitësi vret vetëm kur ndjehet i kërcënuar pasi qëllimi i tij është të marrë atë që ka synim, pra paratë. Gjithçka ishte e dyshimtë, fakti sesi ai e përshkruante grabitjen nuk ngjan me një grabitje reale. Fillimisht shpreha dyshimin tim sesi një veturë private me njerëz civile të grabitet”,-tha Jashari.
I pyetur mbi deklaratën e të pandehurit i cili së fundmi ka ndryshuar sërish dëshminë e tij, duke mos e pranuar se ka inskenuar vrasjen e bashkëshortes, avokati tha se kjo mund të jetë një tentativë e Naim Murselit për t’u mbrojtur duke parë fillimisht nëse prokuroria ka siguruar provat e mjaftueshme që e nxjerrin fajtor.