Edhe pse në heshtje dhe jo aktiv në politikë, Lulzim Basha po vepron. Ai ka depozituar në Kuvend një projektligj, përmes së cilit kërkon ndryshime në Kodin Penal. Ai kërkon që në nenin 120 të Kodit Penal, të shtohen edhe deputetët. Me këto ndryshime, Basha kërkon që nëse një ligjvënës bën një deklaratë ndaj një deputeti, ky i fundit ka të drejtë të bëjë kallëzim në prokurori dhe nëse instancat e drejtësisë vërtetojnë që deklarata është shpifje, deputeti rrezikon nga gjobë deri në 2 vite burg.
“Kur kjo vepër kryhet nga të zgjedhurit, gjatë kohës së ushtrimit të mandatit, në seancat parlamentare të Kuvendit, apo në çdo forme tjetër, përben kundërvajtje penale dhe dënohet me gjobë ose burgim deri në dy vjet”, thuhet në projektligjin e propozuar nga Basha.
Propozimi nuk është rastësor, dhe vjen pas akuzave që Gazment Bardhi bëri ndaj tij, duke i thënë se ka përfituar dy kate në rezidencën ”Lion” të Tiranës. Kjo përplasje e dy ish-bashkëpunëtorëve të ngushtë ndodhi më 5 tetor në Kuvend, ndërsa Lulzim Basha e akuzoi Gazment Bardhin se është bërë pjesë e aleancës së kullave Berisha-Rama.