Deputeti socialist Erion Braçe, ka ndarë mbrëmjen e kësaj të enjte një video të agjencisë amerikane të lajmeve “Associated Press”, kur lideri socialist Fatos Nano u burgos me urdhër të presidentit Sali Berisha dhe shkoi me pranga në varrimin e së ëmës.
“Nga burgu i tmerrshëm, për të përcjellë nënën e tij; e keni aty fytyrën kafshërore të rregjimit-bëri diferencën njeriu, njeriu, Paulini ynë; Kafshëri që vijoi dhe vec kreu i atij rregjimi mundi ta bëj. Shiheni videon-i preu rrugën korteut mortor për të kaluar në sheshin qendror për në Sharrë”, shkruan Braçe.
“Une nuk e di ku e gjeti forcën ai njëri edhe një herë të përmbante zemërimin e njerëzve që po plasnin! Por e kam një përgjigje: Mashkull lind, burrë bëhesh, burrë ç’bëhesh duke vrarë njeriun aty brenda; njëri do forcë, shumë forcë të mbetesh”, vijon ai.
Ky reagim dhe kjo video që risjell Erion Braçe vijnë në një ditë kur Kuvendi i Shqipërisë vendosi t’i hiqte imunitetin liderit të opozitës Sali Berisha, duke i hapur rrugë arrestimit të tij nga Prokuroria e Posaçme, shkruan newsbomb.al
Në Mars 1992, Partia Demokratike fitoi zgjedhjet dhe një vit me pas Fatos Nano u burgos pasi u akuzua për korrupsion dhe abuzim detyre nga gjykata. Burgosja e tij u bë problemi kryesor i Shqipërisë post-komuniste, sepse socialistët besonin se burgosja ishte pasojë e opozicionit të Nanos ndaj qeverisë së Berishës.