Një ditë pasi Kuvendi i hoqi imunitetin, SPAK iu drejtua Gjykatës për miratim të masës së sigurisë arrest shtëpie për ish-kryeministrin Sali Berisha. Për këtë kërkesë Gjykata do të shprehet më 26 dhjetor, ndërsa Berisha bëhet gati për t’u izoluar.
Eksperti i sigurisë, Ilir Kulla, i ftuar në “Zonë e Lirë” tha se Berisha nëse do zbatonte masën e parë “detyrim paraqitje” do ta kishte më të lehtë betejën, por tani gjerat kanë ndryshuar dhe izolimi i tij në shtëpi do të zgjasë për një kohë të gjatë.
“Unë mendoj se Berisha do ta kishte më të lehtë, nëse në shkallën e parë do shkonte dhe nuk do t’i hapte luftë gjyqësorit”, tha ai.
Sipas tij, Berisha e ka dënuar veten me arrest shtëpiak pasi i ka shpallur luftë SPAK. Ai shtoi se nëse ish-kryeministri tenton ta thyejë këtë masë rrezikon burgun.
“Berisha e ka dënuar veten me arrest shtëpiak për kohë të gjatë, sepse e sfidoi SPAK-un. Unë mendoj se do jetë për kohë të gjatë në arrest shtëpiak dhe nëse i sfidon prapë, rrezikon masën e arrestit me burg”, tha Kulla.