Partia Demokratike ka ofruar një marrëveshje që indirekt i vjen në ndihmë edhe deputetit Ervin Salianji.
Deputeti demokrat Ferdinant Xhaferaj ka depozituar në Kuvendin e Shqipërisë një amendament ku kërkohet amnistimi i çdo personi që është dënuar me deri në 2 vite heqje lirie, të falet.
“Pushohen të gjitha çështjet penale të pashqyrtuara ose në proces shqyrtimi nga gjykatat e apelit, për veprat penale të kryera deri në datë 30.06.2023 për të cilat gjykatat e shkallëve të para kanë dhënë dënim me burgim deri në 2 vjet, ose çdo lloj dënimi tjetër më të butë, me përjashtim të dënimeve për veprat penale të përcaktuara në pikën 1 të këtij neni,”-shkruhet në amendament.
Nëse miratohet, nga ky amendament përfiton edhe Salianji. Ai është dënuar me 1 vit heqje lirie pasi u shpall fajtor për “kallëzim të rremë” lidhur me të ashtuquajturën dosja “Babale”. Megjithatë, dosjen e tij e dërgoi në Apel, e nëse trupa gjykuese do të konfirmojë vendimin e Shkallës së Parë, atëherë deputeti Salianji, rrezikon burgun. Por rrjedhimisht edhe mandatin e tij të deputetit. Kjo pasi nuk do të ketë mundësi që të garojë në zgjedhjet e ardhshme parlamentare, të cilat do të mbahen në vitin 2025.