Alma Lleshi Tandili, kryetare e Agjensisë së Mbrojtjes së Fëmijëve ishte këtë të martë e ftuar në Euronews Albania ku ka treguar se fëmijët e Jetnor Zhabolit, i cili mbante të burgosur familjen në banesë, kërkojnë që babai i tyre të shërohet.
Ajo tha se fëmijët e 35-vjeçarit duan që ai të rehabilitohet e të kthehet në familje. Sipas Tandillit, Zhabolli ka shfasqur probleme shumë të mëdha psikologjike dhe emocionale.
“Fëmijët asnjëherë nuk i fajësojnë prindërit e tyre. Pavarësisht se ata mund të dëshmojnë, në perceptimin e çdo të mituri ata familjen e duan të bashkuar. Vajza në deklaratën e saj ka thënë “Unë dua që babi të shërohet”.
Ky është mesazhi që ne e përcjellim të gjithë. Përveç monitorimit dhe ndihmës që i ka dhënë struktura shtetërore me psikolog gjithë kohës, ata duan kohën e tyre tani për t’u qetësuar e për të marrë frymë lirisht.
Nga ana tjetër ata kanë shqetësimin që ai të rehabilitohet e të kthehet në gjendjen e mëparshme për të pasur një marrëdhënie harmonike siç e kanë pasur. Fëmijët tani jetojnë në banesë me nënën e tyre dhe me gjyshërit që shkojnë dhe vijnë, se ata jetojnë në banesa të ndara”,-tha Tandilli.