Lulishtja e re në Lezhë është transformuar si një hapësirë e dedikuar për fëmijë e të rritur, por edhe për turistët. Kryeministri Edi Rama mëngjesin e sotëm publikoi pamje nga kjo lulishte, teksa thotë se ajo është në shërbim edhe të turizmit, por nxjerrë në pah vlerat e memorialit të Skënderbeut, monumentit të vyer historik, që ndodhet përballë saj.
”MIRËMËNGJES dhe me transformimin e Lulishtes së re në Lezhë që shtrihet përbri lumit Drin, si një hapësirë e dedikuar për fëmijë e të rritur, por edhe në shërbim të turizmit të qytetit, duke i nxjerrë më në pah vlerat e Memorialit të Skënderbeut, monumentit të vyer historik, që ndodhet përballë saj, ju uroj një ditë të bukur”,-shkruan Rama.
Projektet investuese në Lezhë e kanë transformuar këtë qytet duke mundësuar pamje të re moderne e hapësira cilësore për banorët, por edhe për vizitorët. E shtrirë në të dy anët e lumit Drin, e rrethuar nga lagunat Kune e Vain, si dhe nga plazhi i bukur i Shëngjinit, Lezha ofron bukuri natyrore të larmishme dhe mundësi të shumta për zhvillimin e turizmit jo vetëm brenda territorit të saj, por edhe në një distancë të afërt.