Një grup prej 18 ligjvënësish republikanë i kanë kërkuar presidentit amerikan Joe Biden të fshijë llogarinë e tij TikTok, me argumentin se është shqetësim për sigurinë kombëtare. Në letrën e tyre, të parë nga Reuters, ligjvënësit theksojnë se Biden injoron rreziqet e njohura të sigurisë të paraqitura nga TikTok.
“Si mund t’i paralajmërojë qeveria federale amerikanët për rreziqet e aplikacionit kur kreu i shtetit po e përdor atë?”, vijon letra. Ndër ligjvënësit që nënshkruan letrën janë senatorët Marco Rubio, John Barrasso, Marsha Blackburn, Rick Scott dhe Josh Haëley. Ekipi i fushatës së Biden krijoi së fundmi një llogari në TikTok, ku ai ngarkoi për herë të parë video më 11 shkurt, duke synuar të tërheqë votuesit më të rinj. Videoja e parë ka 9.6 milionë shikime deri më tani, ndërsa llogaria e Biden ka 162,000 ndjekës.
TikTok, i cili është në pronësi të kompanisë kineze ByteDance, është akuzuar nga shumë politikanë amerikanë si një mjet propagandistik i qeverisë kineze, gjë që kompania e mohon me forcë.