Kryeministri Rama shprehet i keqardhur që PD dhe LSI nuk do të marrin pjesë në zgjedhje, ama nuk ka ndërmend të bëjë asnjë përpjekje për pjesëmarrjen e tyre në zgjedhje.
“Unë nuk kam ndërmend të bëj asnjë përpjekje për ta. Në një sistem demokratik asnjë subjekt nuk është i detyruar që të futet në zgjedhje. S’ ka asgjë që e detyron mazhorancën që të tërheqë me zor ata që nuk duan të marrin pjesë në zgjedhje. Moment i pazakontë, por ka potenciale për të krijuar një situatë të re politike”, tha Rama.
Në një dalje për mediat pak më parë nga Selia e PS, Rama u pyet nëse ndihej i mërzitur që nuk do të kishte përballë Lulzim Bashën, në zgjedhjet e 30 qershorit.
“Duhen gjëra më të mëdha që unë të mërzitëm. Jam i keqardhur sigurisht që PD dhe simotra e saj e vogël LSI ka vendosur të shkojë në një rrugë pa krye. Shpresoj që të ketë një kthim”, u përgjigj kryeministri.