Ish-drejtori i fabrikës së demontimit të municioneve në Gërdec, Dritan Minxolli refuzoi të dëshmonte në procesin ndaj ish-ministrit të Mbrojtjes, Fatmir Mediu.
I vetmi që pranoi të japë dëshmi ishte Rezart Tërshana, ish-shef sektori në Drejtorinë Juridike në Ministrinë e Mbrojtjes. Tërshana tha se kishte qenë anëtar i komisionit të çmimeve të municioneve për demontim.
“Ne përcaktimin e çmimit për demontim, elementet e kostos ishin në një anë, vlera e mbetjes, produktet që përftohej në anën tjetër. Diferenca nxirrte çmimin. Ne nuk kemi llogaritur kostot e transportit. Komisioni i çmimeve e vendoste çmimin në magazinë. Ne nuk e dinim se ku do të shkonin. Ne madje nuk dinim as depot nga do merreshin. Me to merreshin strukturat ushtarake”, tha dëshmitari.